林伯走了

林百欣逾10億打造亞視黃金十年

亞視永遠名譽主席林百欣昨日病逝，其當年愛將大姐明林建明接獲林伯死訊時，傷心得當場落淚，並為未能到醫院見林伯最後一面感到遺憾。而林伯掌管亞視的十多年間，多番創下佳績，令無線變陣迎戰 。

亞視永遠名譽主席林百欣昨日在瑪麗醫院逝世，靠成衣生意起家的林伯，八八年進軍娛樂圈，與鄭裕彤聯手以四億元購入亞視三分一股份，積極開拓其亞視王國，並在九四年成為亞視最大股東，至九八年才將大部份股權出讓。亞視在八八年至九八年林伯期間，花了逾十億創下不少驕人成績，打破無線慣性收視，其中《今日睇真D》便是當中最成功的例子，而《睇真D》開國功臣、亦是林伯生前最疼錫的藝人林建明（大姐明），昨日在尖沙嘴開會期間接獲林伯死訊時，心情悲痛不已，她憶及當年林伯種種，禁不住即場落淚。大姐明說：「聽到呢個消息真係好難過，林伯開始run亞視時，好想搞好電視，所以佢肯畀人作新嘗試，好肯接納唔同意見，當年我過檔亞視主持《今日睇真D》就係一個成功例子。林伯為人好親切，我記得當年每逢過年，我o地成班藝員最鍾意同林伯拜年，知道林伯鍾意食魚柳包，大家就買埋魚柳包同佢拜年，而且重成日搵佢笨，呢頭同佢完利是，轉頭又同佢過，林伯雖然知道，但都一樣咁開心派利是畀我 。」

林百欣在八八年向邱德根買入亞視後，十餘年間估計蝕了逾十億，最後更要將部份股權賣給封小平及劉長樂。雖然亞視多年來一直處於劣勢，加上無線的慣性收視，可以說是捱打狀態，不過亞視亦有不少代表作，其中林伯擔任行政總裁一職期間，九五年是最風光的一年，能與無線爭一日之長短，迫到友台頻頻變陣。

屢創佳績多次痛擊無收視亞視憑資訊節目《今日睇真D》，令無線急急跟風推出形式近似的《城巿追擊》，而《今》的「解剖外星人」，引起全城轟動，收視平均有二十九點，奪得百分之六十六的收視率，創造了歷史性新高，可以說是贏了無線漂亮的一仗。另外，九五年無線和亞視鬧出「雙包案」，亞視播映的《包青天》收視亦接近二十點，同年亞視高薪挖走無線藝員鄧萃雯、陳秀雯和商天娥合演的《再見艷陽天》，亦大受觀眾歡迎，平均收視高達十五、六點，無線臨時要抽調《真情》以作對撼，甚至連卡通片《蠟筆小新》亦奪得超過二十點的高收視，更成為城巿話題。而另一亞視的代表作，是八九年推出、由蔡瀾、倪匡和黃霑主持的清談節目《今夜不設防》。

亞視眾星憶舊老闆堅毅勤奮

林百欣當年雖然身為亞視大老闆，但在員工面前毫無架子，曾為林伯效力的藝人，昨日接獲林伯病逝消息時均深感哀痛，感慨萬分，亞姐冠軍出身的羅霖讚揚林伯為人勤奮，更認為香港人應向他學習，遇困難不要放棄。

羅霖：林伯係一個好親切同勤力長者，返工返足七日，佢成日都提點我要勤力工作，香港人都應該有林伯精神，要勤力工作，遇到困難唔好放棄。我最敬重佢做好多善事，捐錢係億億聲，人成日話佢慳，其實佢慳自己唔慳人，我以前亞視台慶同新春團拜時陪林伯身邊，好多藝人成日返轉頭幾次利是，林伯係知，不過佢都派完又派。

陳煒：我以為林伯割膽石同跌親，唔知道咁嚴重！林伯平時都有做運動，年一齊去馬場，佢行得重快過我。林伯為人冇階級觀念，鍾意同人分享心得同意見，記得有次我同林伯講話想台灣做美容生意，林伯即刻話好，重話台灣三溫暖搞得好好。

杜汶澤：我一出道就同林伯打工，依家就同佢個仔林建岳打工，真係好巧合。我覺得林伯好勤力，無論佢幾忙都好，佢都會抽時間出席function。

張文慈：林伯係一位好好老闆，佢好體貼同照顧員工，試過跟佢返潮州公幹，佢好關照我。我好欣賞呢位長者工作既魄力同毅力，凡事親力親為，我祝福佢離去時可以舒舒服服，去一個好開心既地方。

尹天照：好愕然，好唔開心，林伯好有魄力，我好佩服佢，而佢對員工好好，我咁講相信好多員工都會認同。

陳啟泰：佢係一個事事親力親為老闆，我覺得好可惜。

劉錫賢：我初初入亞視做婦女節目時，一路以為冇乜人識自己，有次林伯出席亞視活動，佢竟然猛問肥仔賢o係邊，原來佢有睇我做節目，估唔到佢咁好記性，連婦女節目都有睇，令我好感動。

李香琴：我同林伯生日只差一日，所以每年林伯生日，都會叫埋我一齊慶祝，林伯過生日我都有出席。幾個星期前我都有同林伯見面，佢好精靈好精神，重以為佢大步檻過，點知冇幾耐就入醫院。

黎燕珊：林伯一直都好支持當年亞姐所辦仁美清聚，當年亞姐月薪只得幾千蚊，曾經有亞姐向林伯提出苦況，林伯即時眼有淚光話：「咁慘？我有商場舖位未租出，不如用來做休息間啦！」雖然亞姐其實想要求有服裝津貼或者加人工，但林伯一番心意都令大家感動。而林伯同佢朋友不時都有商場剪綵活動安排亞姐同藝人出席，好多時都係林伯自掏腰包封利是畀藝人。